|
|||||||
|
|
|
|||||
|
|
|||||||
|
|||||||
|
|
|
|||||
|
|
|||||||
Here you'll find: 三級制, $$一百萬$$, 死咗佢咪算囉, 讀屎片, 陰謀論, 罪有應得, 長生不老, 笑話, 唉 and 基準試笑話.
你話我細膽又好, 無Q用又好, 有時我真係唔多夠膽去睇香港報紙啲頭板. 點解? 好簡單, 差唔多每日都 有啲勁核突嘅相. 一時就係條友唔見咗隻手, 血淋淋周圍走. 一時就係個細路俾兩部車夾做人肉三文治. 我真係幾服啲報紙editors, 咁都准啲相出街. 如果報紙有三級制, 我估應該有二至三份會攞三級. 我係 話邊幾份? 大家都心照啦!
我記得之前有份報章話咁做都係為咗警惕大家做嘢要安全... 但係唔係一定要登張滿地鮮血嘅相先至可以 得到"警惕"嘅效果? 嗰啲傷咗/死咗嘅人絕大部份都有家人朋友. 佢哋見到啲相上頭條, 俾幾十萬人睇嘅 感覺應該唔會好得去邊. 就算條友死咗, 啲人點都要對佢有小小尊重.
To be continued...
三級制? (2)
就算唔講嗰D核突相, 嗰D報紙報導時所用嘅語氣/用詞係完全可以唔使咁誇張. "...x頭被一輛迎頭車輾過, 頭骨爆製, 血肉橫飛, 腦漿四濺, 死狀恐怖......" 大佬, 你又唔係寫小說, 記住你哋係報道新聞. 同正 常報導(如電視新聞)比較, 這種報導形式只能夠以誇張,過份來形容. 講到尾, 嗰D辦報紙嘅都只不 過係為咗銷量, 並唔係所謂警惕市民!
仲有嗰D成人版, 如果唔係D團體俾壓力D報紙, 九成九D報紙會繼續有叫雞指南而且唔刻意將成人版同其他 版分開. 呢D報紙更本就係兒童及青少年不宜! 身為有最多讀者嘅報紙居然咁做, 我只可以話辦嗰D報紙嘅 人無道德, 只係識揾錢! LMF 嗰首冚家鈴真係冇罵錯!
不過講開又講, 呢幾份報紙真係好好賣. 唔通D人根本就係為咗睇血淋淋嘅相同成人版而去買嗰D報紙??
三級制? (3)
講到血淋淋, 又點可以唔提"睇你點死"此"紀錄片". 正如其名, 成套片大部份時間都係睇啲人點死, 如吞槍自殺, 被野獸咬死..但係片來全部都係真人真事, 每一個片段差唔多都係一個人生前最後嘅一刻. 我自已覺得無必要同無膽去睇, 但係我知道有唔少人睇過. 有啲人話一個鏡頭比一個鏡頭恐佈, 又有啲人話佢哋一啲都唔驚.
啲人點解會睇此片? 係唔係因為覺得此片有"警惕"作用, 如"唔好行埋去獅子堆"? 定係為咗娛樂?
為咗娛樂, 點解唔睇周星馳? 係唔係因為唔夠刺激? 係唔係因為唔夠暴力, 血腥?
想要暴力, 血腥, 點解唔睇李小龍? 又或者走去街市睇人劏雞?
定係因為啲人知道, 螢幕內嘅人真係死咗?
唔知大家有無聽過 Big Brother 此節目. 嚟個唔係李小龍嗰套戲, 而係一個俾八公八婆睇嘅節目. 以我 所知, 此節目最初喺荷籣到播, 而且十分之受歡迎. 之後英國同美國都做當地嘅板本, 受歡迎程度有如 香港嘅男歡女愛. 從商業角度來講, Big Brother 可以話係近期低成本, 回報率高嘅代表作.
個節目講乜? 個電視台由一大羣自願者(約二萬人)中抽十個人, 然後送佢哋入一間大屋入面. 嗰到同外界 完全分隔. 屋內有二三十部小型攝錄機裝咗喺每一個角落, 包括廁所在內. 啲人嘅一舉一動都可以俾人 睇到. 每日啲片段都被剪成半粒鐘至九個字嘅精華播出. 咁咪同 Truman Show 無分別? 咁又有啲分別嘅. 啲人係自願, 唔似 Truman 咁乜都唔知.
至於點解咁多 人會想俾人由朝睇到晚? 一個字:錢. 每一個星期屋內所有人都要選兩個入被踢出門口. 得票最多嗰兩個 就要再由觀眾選出其中一個. 得票最多嗰個就被踢出門口. 最後剩底嗰個可以贏得約一百萬港紙. 當然輸咗嗰九個唔會空手而回. 雖然無獎全, 但係D八卦雜誌會同佢哋做訪問. 一夜之間, 佢哋變成新聞 人物, 同明星無分別.
你會唔會做?
$$一百萬$$ (2)
我啱啱睇完Big Brother, 覺得點都要做個關於Big Brother嘅post. 點解? 因為今日喺間屋到所發生嘅事可以話係由節目開始以來最激, 激到Big Brother網頁據聞要暫時停止網上廿四小時播放, 激到其他電視台嘅新聞節目都要花幾分鐘去報導. 當然第二日嘅報紙一定會提此事.
話說屋內有位叫Nick嘅人, 佢由第一日開始就嘗試控制其他人, 令佢哋選Nick自己想踢走嘅人. 而同時又向自已想踢嘅人扮關心. 一直以來, 雖然觀眾都知佢啲衰嘢, 但係屋內啲人完全唔發覺, 而且外界係無機會接近屋內嘅人, 所以Nick成為屋內嘅好好先生, 從來無人選佢走.
但近幾日, 有人開始懷疑Nick嘅行為, 嗰晚佢哋揾到Nick自己認為應該被踢走嘅名單, 而且有幾個板本. 當佢哋發現Nick同唔同嘅人所講嘅嘢都唔同, 而且利用佢哋, 屋內全部人決定同Nick講數...
電視只係播咗咁多, 至於期間有無發生其他事,真條無人知. 或者咁樣係電視台想觀眾估吓啲人會做乜. 其實Big Brother熱潮已經開始減退, 因為近一個星期屋咁都無乜大事發生...老實講如果Nick真係被踢走嘅話, 成個節目會變得好悶!!
如果你係Nick, 你會點做?
$$一百萬$$ (3)
Big Brother現在可以話係最新嘅節目形式. 美國最近有報導指出, 下一個以Big Brother為藍本嘅節目快將推出. 十個人將會被送到俄羅斯受訓. 每星期觀眾選一個人被踢走. 不過剩下嘅一個並唔係羸獎金, 而係可以離開地球, 去Mir太空站!
講到Big Brother嘅來源, 除咗Truman Show之外, 另一個係一本叫Lord Of The Flies嘅小說. 內容係講一班十幾歲嘅細路因為沉船而去到一個荒島生活, 而最後大家互相殘殺. 喺Big Brother之前, 有電視台送十多人去荒島到住幾個月, 拍攝佢哋嘅生活.
有睇香港報紙嘅都知道又有個大學畢業生自殺. 一個人就咁唔要自己條命好多人當然係覺得非常可惜, 但我就覺得D人係唔係就要自殺實在自私. 我當然唔係淨係講呢個畢業生, 近呢一排唔單只係大人, 就連十零歲嘅細路都走去死. 最令人擔心嘅就嗰D細路自殺嘅原因. 一時就係因為俾屋企人話兩句, 一時就係因為考試差. 講到尾呢D人都係唔堅強, 冇膽去面對現實. 一唔開心, 一遇到挫折, 就唔嘗試去理智地解決問題, 而係走去死. 以為咁就可以一了百了.
但係唔係因為死咗, 乜都唔使想(應該係冇得想), 就等於一了百了? 咁冇咗個仔個女嘅老豆老母點算? 佢哋嘅朋友點算? 如果佢嘅死喺住宅區, 附近D樓就算賣得出, 個價都唔會好得去邊. 仲有佢哋要人收屍, 清理場地...浪費人力物力! 自殺只不過係自私, 失敗嘅人逃避問題嘅方法!
Return to top
D公開試都放曬榜, 有人開心有人愁. 考得好當然值得慶祝. 但係考得差都唔使太在意, 只要有努力過就得. 我講嘅嘢係有少少行貨, 只不過事實的確係咁.
你哋可能話都放咗榜咁耐, 仲有乜好講. 前一排我喺一個討論區到見到有個自稱考得太好, 大講風涼話. 好自然咁佢俾全世界小咗一大鑊. 無錯, 條友九成九喺到作大吹水. 但係現實世界的確有D考到幾條A就以為自已係天下無敵嘅白痴. 老實講, 真係有料到嘅都知道自已雖然考得好, 但自已所知嘅嘢只不過係一粒沙咁少. 嗰D以為試卷入面嘅就係學問根本就係讀屎片!
Sour grapes? Possibly.
讀書最重要嘅唔係成績表上有幾多條A, 而係求學同求上進嘅精神! 成功係唔使八九條A! 例子? 香港嗰幾個相信都唔使多講. 但係你知唔知二十世紀其中一個最有名嘅數學家早年並無讀完中學, 而且頭兩次入大學都因為考試成績差而被踢出校?
俄國潛艇死咗成百幾人嘅事好似己經告一段落. 但係成件事入面有好多無人可以(又或者係願意, 又或者係夠膽)去解釋嘅疑點.... 就等我胡亂估一下真相可能係點...
1.隻潛艇係喺星期六出事, 但係件事就喺兩日後(星期一)先至公開俾全世界知(包括俄國人民). 係唔係軍部自已都唔知? 當然唔係! 隻潛艇當時係同其他戰艦一齊做演習. 咁大隻潛艇消失唔通連所有人同雷達都唔發覺? 據講D軍官最初係唔夠膽向上級報告此事, 係因為怕隻黑鑊定係另有原因??
2.單嘢星期一公開, 美國同英國等馬上表示願意幫手救人. 但係俄國喺知道自已本身明顯無能力救出被困嘅人嘅情況下, 要等到星期四先至要求外國援助. 咁係因為國家面子問題, 定係因為有D不可告人嘅秘密?? 因為如果所有人死"曬"嘅話, 俄國大可以慢慢去自己處理隻潛艇. (雖然俄國公佈話隻潛艇無核武, 但你信唔信佢?) 假如外國嘅救援隊真係救到D人出來, 外國傳媒就有機會知道真相.
3.喺其中一段關於死者家人同總統會面嘅片段, 其中一個女人在台下企起身臭罵總統. 在場嘅保安將佢按住, 十秒後個女人突然坐低, 一言不發. 電視台後來發現其中一個按住個女人嘅人手持針筒, 而且動作非常似向個女人打針. 點解保安會有針筒? 係唔係用來令向總統臭罵嘅人收聲嘅一種方法??
嗰條大學生終於被判同未成年少女發生性行為罪名成立. 冇錯, 今時今日, 十四五歲嘅女仔失身並唔係太出奇. 但係個人渣嘅case實在係太可恥. 佢自稱有固定女友, 而且佢係願意同個人渣性交. 咁點解佢要出去揾女? 係, 有D人係花心, 對女友不忠, 鐘意溝女. 但係條仆街嘅都成廿幾歲人, 而個女仔得嗰十四歲. 人哋無論身體同心智都未成熟, 條仆街同佢去長洲開房係唔係因為愛佢? 定係條仆街想要佢隻豬? 定係條仆街係變態, 對細路有興趣? 條仆街喺ICQ到識佢, 而去長洲嗰次係兩個第一次約會...
條仆街會唔會喺ICQ到愛上佢? 假設條仆街真係愛佢, 咁係唔係應該等佢大D先至發生性行為?
條仆街最乞我憎嘅地方係佢夠膽話長洲有好多康體活動. 唔通淨係長洲先有康體活動?? 而且有冇必要過夜?? 身為大學生居然可以俾D咁嘅藉口, 條仆街真係當我哋同個官係白痴!
英國一間大學最近成功將一種蟲嘅生命延長接近一倍. 原理係利用anti-oxidants去減少蟲體內嘅radicals. 科學家相信radicals係令生物老化嘅其中一個原因. 雖然大家都會認為蟲同人類相差好大, 但係此研究已經向長生不老(或者應該係話防止老化)呢個人類自古以來嘅夢想踏出重要一步. 而且以機因來講, 人同其他生物植物其實分別唔大. 據聞人嘅DNA有95%同猩猩一樣, 而同某D植物就有大約三成一樣.
唔單止防止老化, 喺複製指定細胞科學家都已經擁有一定技術. 原理係將一個人嘅DNA注人卵子入面, 卵子會開始分裂. 而科學家就抽出一種所stem cells嘅細胞. 理論上此種細胞係可以發展成器官. 話唔定喺五十年後病人可能唔使再依賴死人嘅器官. 什至可以定時換去老化或有問題嘅身體部份.
無論點都好, 有一樣嘢可以肯定嘅係人嘅平均生命會比現在長. 但咁係唔係一定係一件好事?
長生不老? (2)
無錯, 絕大部份人, 包括你同我在內, 就算唔想長生不老, 都想條命長. 以現時嘅科技來講, 要延長生命唔係難事. 長命, 對於個人同家庭都係好事. 但係假如每人有多十年命, 對社會, 甚至對世界來講係唔係一件好事?
百幾年前一個叫Malthus嘅學者估計佢死後冇幾耐世界會面臨一場災難. 原因係人口增加嘅速度將會遠遠超出食物產量嘅增加. 而大部份人會因此而餓死. 佢嘅預言當然並無實現. 嬰兒嘅出生率比一世紀前明顯減少. 喺一D國家每個家庭平均所生嘅數目甚至低過2.1 . 換言之長遠來講呢D國家嘅人口有可能下降. 近四五十年, 農業發展比一般人嘅預期快. 雖然第三世界依然有好多人冇足夠食物, 但係平均來講食物比以前係多好多. 咁Malthus係唔係完全地錯??
喺三四十年後, 老人對年青人嘅比率將會係史無前例嘅大. 老人並冇謀生嘅能力, 需要年青人嘅經濟支持. 到其時所引起嘅問題, 雖然唔可以以災難去形害, 但係唔可以坐視不理. 同你哋無關? 中國嘅single child policy已經對人口分佈有重大影響.
喺美國, 總統候選人小布殊接二連三咁出醜. 先俾人話佢學識少. 然後D人發覺佢唔止學識小, 連D英文都唔多掂. 咁都唔係太緊要, 因為人唔多唔少都會有時講錯D英文. 但係當佢喺一個訪問內被問起一D外國高層人物嘅名時, 佢只能夠以小學生嘅答問題方法去回答 "Genreal.....General.... (pause) General.". 最好笑係佢喺台上俾全世界聽到佢叫一記者為"Major League asshole".
喺英國, 嗰個千禧館開幕一年內第五次因收支不平衡要向六合彩嘅基金度水. 五次合共超過六億英鎊. 本來千禧館係用作展示英國喺世界嘅地位, 而且幾個月前仲由外國請咗D所謂人才去管理. 但係現今就係一個昂貴嘅笑話. 就喺上一次度水時, D高層向全國保証唔會再有下次. 而今次佢哋嘅理由係如果再冇錢, 佢哋就要閉館. 而閉館所需嘅錢會比今次度到嘅錢仲多.
喺法國, 自漁民前一排將所有碼頭霸佔, 要求政府資助佢哋(因為油價太高), 政府又再俾人玩死. 今次唔係漁民, 而係貨車, 的士 同救傷車. 見到政府向漁民讓步, 其他人都加入要政府減油價. 佢哋先將所有油嘅supplies cut咗. 令到現時法國90%嘅油站都冇油. 然後又將各大城市嘅大街霸佔. 玩政府嘅唔止佢哋, 歐聯話有可能因為政府唔控制交通而告政府.
不過要揾笑話, 又使乜走去睇國際新聞?? 香港都有唔少!
Latest: D英國佬見到D法國佬咁惡, 玩到法國政府死吓死吓, 都想攪吓自已嗰政府. 冇時耐之前已經開如行動. 不過成唔成功就好難講....
我最初上網嗰陣, 主要都係玩Chatroom. 初時覺得可以同啲完全唔識嘅人講嘢幾得意. 但係好快我就覺得無聊. 喺Chatroom嘅人十個有八個一開口就問a/s/l. 先頭我唔知係乜, 後來啲人話俾我知a/s/l等如age/sex/location. 當對方係男, 而又知道我唔係女, 好多時佢哋就話: "我只係同女講嘢" 又或者係 "我唔係基佬" 又或者係就咁 "Bibi". 乜佢哋上網嘅目的係為咗溝女? 係唔係上網溝女容易啲?
後來我走去玩Online game, 一玩就玩咗兩年幾, 而且開始喺啲Forums同其他人討論. 嗰啲Forums真係幾正, 啲人會認真咁同你去討論. 喺嗰啲Forums, 想post嘢嘅人都要登記, 所以所有人都要某個程度對自已所post嘅嘢付責.
近幾個月我主要喺一啲香港嘅Forums玩, 但係呢啲Forums令我好失望. 點解? 原因有好多. 可能係為咗吸引多啲人去post嘢, 啲Forums唔需要登記. Forums內啲posts嘅質素可以話係一日差過一日. 雖然啲Forums係以中文為主, 但係有啲人打英文posts. 好多時一啲以為自已好醒嘅人會走去指啲英文點錯, 其他人點冇用, 自己有幾多條A, 真係好乞我憎. 再唔係就係人身攻擊. 喺討論主題到寫如:"xxx英文差" 又或者係 "xxx仆街 icqxxxxxxx" 又或者係 "xx中學xxxsir冇用". 佢哋仲要重複又重複咁post啲廢嘢. 而個版主又懶, 永世都唔delete啲廢posts. 本來Forums內都有幾個有品嘅posters, 但係個個現在都心淡, 都唔再喺Forums到post嘢.
唉...
想信大部份人都由新聞知道基準試嘅樣本試題出錯. 如果錯誤只係幾個錯字嘅話, 咁根本就唔係乜嘢問題. 但係登廣告嗰間學校聲稱份卷有超過六十個錯處. 間學校有無誇大? 我無睇過份卷, 而且自問又唔係乜嘢專家/權威, 所以唔可以俾一個肯定嘅答案. 但係我就覺得考試局對句字累贅 ,被動式太多等嘅批評嘅回應有啲唔啱. 無錯, 被動式太多可以話係個人寫英文嘅風格, 嚴格來講唔可以話係錯. 但係英文寫作並唔鼓勵過份使用被動式. 要教好英文當然要教好寫作習慣. 好似教游水咁, 亂咁爬都游到水, 但係咁代唔代表教練可以以個學生游到水為理由而唔教佢正確嘅泳姿?
教育嘅問題嘅重心唔係教師嘅學歷. 今時今日一般教師都要有一定嘅能力. 其實一個好教師係唔需要科科A. 反而, 我遇過好多由所謂世界一級學府出來嘅教師 (其中唔少係博士), 但佢哋係完全唔識教書. 教師最需要有嘅係想教人嘅心態. 無錯好教師香港有唔少, 但係同時又有好多只係為咗有個穩飯碗而去教書嘅人. 對於嗰啲教師, 教得好又係咁, 教得差又係咁, 佢哋嘅表現好壞無人理. 而且出面又有咁多補習社, 佢哋根本唔需要認真教學生. 事實上, 市面上補習社嘅受歡迎程度就係香港教育過時同失敗最佳嘅証明!
